مقتطفات فلسفية بالعامية

فلسفة الحياة ..

الحياة معقدة و ملفلفة و مش واضح خالص
حاجة عندها قدرة غريبة أنها تفاجئك من يوم ما بتولد لحد ما بتموت
كل ما بتفتكر أنك خلاص شفت كل حاجة ومش ها تتفأجي تاني
بتحصل حاجة تفاجئك و تخليك تفكر
و كل ما بتفكر كل ما تريد حيرتك
كل ما بتحاول تطلع إجابة سؤال ، يطلعلك عشرة أسئلة غيره !
*كثيرة علامات الاستفهام في الحياة و نادرة جداً الإجابات فيها ، بس ده عشان تخرج منها بني آدم مفكر ..

فلسفة الإصرار..

الجنون مش أنك تصر علي تحقيق أمنية عندك !!
الجنون هو أنك تحاول تحققها بنفس الطريقة كل مرة
و أنت متوقع نتيجة مختلفة !!

فلسفة الكتابة ..

الكتابة الجيدة مش مقاسيها النجاح و الفشل في إقناعك بها
بل بتنجح و تفشل في قدرتها علي اجتذابك !
تنجح في أنها تقدر تخليك تفكر ، تنجح في أنها تديك صورة عن أفكار وحياة وثقافات أشخاص ثانية !!
تنجح لو قدرت ترسخ في دماغك لفترة طويلة ، و أثرها يفضل معك طول حياتك
وتفشل لو عملت عكس كده !!

فلسفة الواجب ..

الحاجات اللي كنت متعود تعملها لحد زي "المكالمات ، الزيارة ، تكتبله كل يوم رسالة "
كنت بتعملها و أنت مبسوط و تضايق لو فوت حاجة أو معرفتش تعملها ..
لو عايز تبطل تعملها ، بطل علي طول .
و متعملهش من باب الواجب !!
عشان أهون كتير أن الحد ده يخترع في حجج تبرر أنك بطلت تعملها من أنه يحس أنك بتعملها عشان الواجب !!
عشان الواجب ده شيء مفروض عليك مش بتختاره أنت بإرادتك !!!

فلسفة الناس..

الشيء اللي مش ينفع أعمل قدام الناس

يبقي مش ينفع أعمله خالص ..

فلسفة الحرمان أحياناً ..

أوقات بتحرم نفسك من حاجات ، عشان تفوز بحاجات أجمل

فلسفة السعادة ..

لازم نفرق بين أتنين
إنسان سعيد و إنسان مبسوط !
عشان الإنسان المبسوط مش دائما بيكون سعيد !!
لحظات الانبساط في حياتنا ممكن تكون كثيرة من نكتة سمعتها أو موقف شوفته أو برنامج بتحب تسمعه لكن لحظات السعادة بتكون قليلة عشان هي دي اللحظات اللي بتحس فيها بالراحة و الأمان فا يتولد جواك

إحساس السعادة ، اللي كتير مش قادر يوصلها !
فلازم تفرق بين الاثنين عشان كتير بيضحك وهو جوه بيصرخ !

فلسفة الجمعيات الخيرية ..

بحترم جداً الجمعيات و الحملات و البرامج الخيرية .
لكن
أيه سبب تصوير وعمل إعلانات للناس اللي بيقدموا ليهم مساعدة !، دمعتان و كلمة شكراً
بيولدوا إحساس دخلي إن الناس دي بتضحك عليك !!
أنا مش ضد ترويج الجمعيات والبرامج بإعلانات بسيطة عن طريقة المشاركة و المساهمة فيها ، لكن ضد المتاجرة بظروف و مشاكل الناس .
ضد واحد بيساعد شخص و بعدها يعقد علي قهوة شارعهم ويقول أنا ساعدت فلان الفلاني ، ضد جمعية أو برنامج بيساعدوا أسرة أو شخص مريض أو شخص محتاج مقابل أنه يشكرهم قدام كاميرا !
و أيه الفرق بين قعده القهاوي و كاميرات التليفزيون ؟؟!!

فلسفة الشخصيات ..

(1)

أصعب شخصيات ممكن تتعامل معها ، هم الشخصيات اللي ليهم وشين !
اللي بيقولوا كلام حلو جداً و منطقي و طاغي عليه طابع المعرفة لدرجة توصلك مدي رفع عقولهم،بس كل تصرفاتهم و أفعالهم بتكون عكس كلامهم لدرجة تبينلك مدي سخافتهم و صغر عقولهم !!
و بيكون نتيجة تفكيرك لطريقة التعامل معهم هو أنك متعاملش معهم أصلاً لأنهم أصلاً مش عارفين يتعاملوا مع أنفسهم بدليل أنهم بيقولوا حاجة وبيعملوا عكسها !!

(2)

في شخصيات فاكرين نفسهم أعلي من اللي حوليها أو عندها مميزات ش عند حد

كأنها أتخلقت بأوبشنات زيادة عن الباقين !!

التعامل معهم يا بيكون بهدوء جداً لدرجة تفقدهم أعصابهم أو مش تتعامل معهم أصلا .

(3)

الناس اللي بتحب تألف كثير ، في ناس لازم يكون كل كلامها كذب حتى لو من غير داعي أو من غير فائدة

معاملتهم بتكون التجنب تماماً أو الصراحة المباشرة أو تسمع باهتمام مبالغ لحد ما تلاقي غلطة وترميها له عشان يحس أنك فاهم كذبه و ده سهل عشان الكاذب نسي

فلسفة الفوز ..

الفوز الحقيقة هو اللي بيتسجل بالقلم الجاف عشان في فوز كثير بالرصاص

فلسفة الصبر ..

شعب مصر من غير صبر ، زى قلم من غير حبر
هيكتب أيه قلم من غير حبر ؟ ولا حاجة ولا هيعرف يعمل حاجة أصلاً !
أسمه قلم وخلاص !!
ده غير إن قلت الصبر دي بتخليك متشائم ومكتئب طول الوقت
المشكلة بقي أن قلت الصبر دي بتقلل معها حاجات كتير ، قلت كفاح وقلت نجاح
بتخليك مستعجل علي كل حاجة و عايزها بسرعة لدرجة أنك متفكرش تدور عليها أصلاً
قلت الصبر بتخليك دائما قاعد تشتم و تلعن في حاجة مجتش و أنت أصلا مسعتش و مصبرتش عليها لحد ما تجي !!
و بيترتب عليها الكسل والزهق و الملل وعدم النجاح و لعن سوء الحظ ؛
ما هو  لازم تعرف أن القلم مش هيكتب غير لو كان في حبر ..

فلسفة الذكاء ..

ما فيش حاجة أسمها إنسان غبي و إنسان ذكي

في حاجة أسمها إنسان زكي في حاجة و إنسان غبي في نفس الحاجة و العكس ..

الذكاء نسب في كل حاجة و كل واحد نسبته بتختلف عن الثاني ..

فلسفة الغباء

للذكاء حدود .. الغباء لا ..

فلسفة النجاح ..

نجاحك مش معني فشل الآخرين .. و لا نجاح الآخرين معني فشلك ..

فلسفة مشكلة الزواج ..

مشكلة الجواز مش في أنك تلاقي الشخص المناسب

المشكلة في أنك تكون الشخص المناسب.

*************

سارة يحيي محمد ...