الجمعة، 12 يوليو، 2013

مجرد فضفضة !!!








ناس كثير شايفين أن العامية لغة دراجة و مش مناسبة لفن الآداب لكن في أنا شايفها زى الفصحى لغة قيمة و ممكن توصل معاني كثير و في كتاب و أدباء كثير استعملوها في كتب و حوار روايات ، هي الفكرة أن كل فكرة بتكتبها بتحدد لغتها و الطريقة اللي ها تكتبها بها و إن العامية لغة لو استعملنها بشكل صح من غير ألفاظ دراجة ها تبقي لغة مفيدة ..
لكن الفضفضة دى بالذات اختارت العامية ..
أوقات كثير حاجات بتضايقنا و بتوجعنا و بتجرحنا بس بنسكت عنها عشان كلامنا فيها مش ها يغيرها أو يمنعها ..
أوقات بنحس أن المجتمع و اللي حولينا فيه ضيقين علينا أوي و أن أحنا لوحدنا أوي رغم أن وسطنا ناس و ده إحساس أصعب من إحساس الوحيد بجد ..
اللي بيوصلنا للإحساس ده حاجات كثير  منهم الناس اللي مش فاهمك ، طبعا ده وارد إن حد مش يفهمك لكن اللي مش وارد أنه يسخر من كل حاجة أنت بتعملها أو بتحبها لمجرد أنه مش فاهمها ولا فاهمك
مش وارد أنه يشوف اللي بتعمله أي كلام و تافه و يقلل من أي حاجة بتقولها حتى لو صح لمجرد أنه مش فاهمك !
ممكن جداً مش تفهمني لكن مش ممكن أنك تصغر شخصيتي لأنك مش فاهمها !!
و منهم الناس اللي بترمي كلام يوجع ويكون ردها " أنا كنت بهزر و مش قاصد" ممكن يكونوا مش قاصدين وممكن ننسي الكلمة لكن ننسي وجعها أزاي !!
و لا المفروض أتوجع و أخدها هزار و كأن ما فيش حاجة و أتعامل عادي مع ناس هزرت بكلام يوجعك يعني لما تتجرح أعرف أنهم بيكلموك جد ..
و الأصعب لما يكون القريبين منك فاكرين حلال مشاكلهم وعقدهم بس ، مش قادرين يفهموا أنك محتاج تتكلم زيهم محتاج تتخل عن دور السامع و تدخل في المتكلم .. لكن هم فاكرين أنك حلال العقد و مش عندك مشاكل ولو بطلت تبقي أتكبرت !!
و حاجات كثير بتخنقك و بتجبرك علي وحدتك ، اللي بتكون أحسن  كثير من أنك تعيش وسط كل دول !!
ده غير المواقف اللي ممكن نتعرض لها ، مواقف عابرة لكن بتخليك تفكر كثير و تتضايق كثير ..
زى مثلاً لما حد يطلب رأيك في حاجة فمن الطبيعي أن رأيك ها يكون يا حلوة يا وحشه أو متوسطة و في كل الأحوال ها تقول ليه ، لكن لما تقول وحشه يضايق و ينترفز و يطلعك غلطان أو غيران منه دى حاجة مش طبيعية لأن مش كل حاجة ها تعجبك و مش لأنها بتاعته هو تبقي لازم تعجبك !!
أنا وصلت معايا لمرحلة أني لما حد يسألني عن رأيي ها أقوله رأيي بصراحة ولا اللي عايز تسمعه أنت فيها ؟؟
و زى أن حد يدخل يكلمك يقولك أزيك و عامل أيه والله أنا كنت عايز ، بيتهألي لو أنت قولت أنا عايز كذا علي طول أصلاً أرحم من الطريقة دي!!!
الحياة بقيت صعبة و الناس أصعب و دائما الاتهام أنك أنت الغلطان وهم الملائكة فا بتكون الوحدة هي الحل و لما حد يسألك أنت عايش لوحدك ولا مع أهلك بيكون ردك أنا عايش لوحدى مع أهلي ..
زى أنا عايش في جزيرة وسط بلد كبيرة !!!
و أهي مجرد فضفضة




هناك 4 تعليقات:

  1. فعلا احساس صعب
    وحيد بين ناس المفروض ماتحس بينها بوحده
    رأى مايقبلهوش رغم قربهم منك
    ضيق زايد فى الروح من وجود لا شئ يفهمك
    او يتقبلك كما انت وبس !!


    تسلمى للفضفضه
    واللغه العامية عادية جدا بتوصل اسرع كمان فى مرات كتيرة.. وشويه شويه هتلاقيها سهله جدا
    وماتعرفيش تستغنى عنها فى الكتابه كمان ...

    دمتى بخير :)

    ردحذف
    الردود
    1. هو مش كل حاجة المفروض بتحصل للأسف بس الناس بطلت تفهم بعض أو تتقبل بعض وي ما هي !
      فعلا أحيانا بتوصل أسرع لكن في ناس شايفنها دراجه و ده غلط
      متشكرة أوي لردك
      نورت بجد :)

      حذف
  2. الوحده مؤلمه
    والمؤلم اكتر منها
    لما تكوني في وسط ناس كتير وبردو حاسه إنك لوحدك !

    الفضفضه ماتنفعش إلا بالعامية أصلا
    بيبقي فيها من روحك وكأنك صوتك مسموع

    تحياتي ليكِ :)

    ردحذف
    الردود
    1. أحساس صعبة أوى بجد ..
      فعلا الفضفضة لازم صوتها يكون مسموع وطالعه منك
      بحب ردودك وكلامك أوووووووى
      نورتنى بجد :)

      حذف