الثلاثاء، 10 سبتمبر 2013

مجتمع .. جايز ! "مقال"



مقال ساخر




صوت صريخ و كلام مش مفهوم في عمارتنا و الساعة لا تتجاوز التاسعة صباحاً فنهضت مسرعة إلي الخارج خشيت أن يكون هناك لص أو العمارة ستنهار و أنا معها لكني صعقت حين فتحت باب الشقة فلقد كان هناك تجمهر أمام السلم و أغلبه سيدات تقف بثياب النوم علي شكل حلقة  تولول و تصرخ بكلمات لا تفهمها هي نفسها ، مدت رأسي إلي الأمام لأعرف لما يقفون هكذا هل هو طقس يومي جديد؟ ربما فالسيدات لا تكف عن اختراع الأشياء _ أحم_ ذات قيمة طبعاً
المهم أنه لم يكن طقس فتصرفاتهم عشوائية فتجرأت و قررت سؤال "طنط" نوال التي تقف عند مدخل شقتها ترمقهم باحتقار و منخارها يتزيد في البروز حتى ظننت للحظة أنه سيتخطى منخار نقار الخشب ، لكن تشجعت و سألتها ( طنط هو في أيه ؟ .. هم بيعملوا مسابقة أقوي حنجرة ولا حاجة " نظرت لي باستخفافه ثم انشطر فمها نصفين بحركة مصمصة رهيبة ( أصل عزة أخت ليلي عايزه تتجوز ثاني بعد ما جوزها مات و عندها أبن " ابتسمت و كأني جبت التائهة ( آه بيعملوا ليها فرح و كده) فجأة تحولت لأمنا الغولة و صرخت باحتقار ( ده بيعملوا فرح عليها ، تتجوز أزاي و هي أرملة و معها أبن الناس تقول أيه المجتمع ها يبصلها أزاي ) نظرت لها بدهشة و لم أرد لأن الفرح قد اشتد و وصله إلي ذروته علي عزة المسكينة التي تجلس ممددة داخل دائرة السيدات والتي أوشكت علي الإصابة بالصم و البكم و العمى و الهستريا و أن يتهتك جهاز العصبي يا لكِ الله يا أبله عزة L
المهم أنني دخلت و اتجهت إلي جهازي الحبيب و كتبت في محرك    بحث جوجل جملة صغيرة تتكون من ثلاثة كلمات في نهايتها علامة استفهام _بالنسبة لي_ كبيرة إلي حد مربك إلا وهي
" معني كلمة مجتمع " ..
دهشت من كم المواضيع التي ظهرت و التي تنتظر مني أن أقرائها و هذا شيء يحتاج إلي أسبوع كامل و معه برميل عائلي من القهوة التي لا أحبها لذا اكتفيت بعض الموضوعات و استخلصت منها أن كلمة مجتمع مأخوذا من كلمة إنجليزية "  society"  و تعني التعايش السلمي بين الأفراد و تقبل الفرد للآخرين المختلفين عنه ..
ده المعني العلمي المختصر لكلمة مجتمع لكن الوضع مختلف تماماً لكلمة مجتمع هنا ..
المجتمع هنا يتكون من مجموعة العادات و التقاليد التي يعيش به مجموعة من الناس رغم اختلافات البشر و رغم أن استحالة وجود إنسان شبه الثاني في حاجة ده حتى الأخوات بيكون بينهم اختلافات لكن مش مهم ، المهم هو أن الناس تمشي علي العادات دي مهما كانت أصلها عادات راسخة في المجتمع !!
مجتمع ؟!
مجتمع أيه ده اللي حرم جواز المطلقة أو الأرملة لمجرد أنها أتجوزت قبل كده ، ومجتمع أيه ده اللي أيه اللي قال أن الشاب اللي بيتكلم مع بنات يبقي بيتسلي بهم و إنسان غير سوي عشان تقريباً مش سامع باختراع الصداقة !، و مجتمع أيه ده اللي بني حواجز بين المختلفين و صور أي شخص مختلف عن الثاني كافر و شرير و منبوذ !!
مش ده المجتمع اللي عمم الصح و الغلط عند كل الناس ، يعني لازم الصح عندي يكون صح عندك و إلا نقطع علاقاتنا و أمسح رقمك و أعملك بلوك علي الفيس بوك و لو أتقابلنا في الشارع أضربك رصاصتين و أقف أفهمك أد أيه أنت غبي مش فاهم حاجة و أني صح !
لكن مين قال أن الصح عندي لازم يبقي الصح عندك ، مين قال لمجرد أننا مختلفين نقاطع بعض مع أن ممكن جداً أختلف معك و كل واحد منا يعمل اللي يريحه و نبقي أصحاب زى ما أحنا عادي جداً !
و عادي أن الصح و الغلط عندنا يبقي مختلف و عادي حاجة شايفها صح غيري يشوفها غلط و نتعايش مع بعض عادي و الله عادي أقسم بالله عــادي ..
آه سمعتك علي فكرة
آه أنتي اللي بتقولي حرام وحلال و بصراحة زى ما سمعتك نفسي أشوفك .. نفسي أشوف الإنسان اللي سايب كل اللي ورائه و اللي قدامه و قاعد يكتب قائمة بالناس اللي بتعمل حلال و داخله الجنة و اللي مش عجبه و من وجهة نظره بيعمل حرام يرمي علي قائمة النار !!
أكيد إنسان جابر اللي يقدر يعمل كده ! ، بس سؤال مين عينك قاضي علي الناس مين طلب منك تحلل و تحرم و مين طلب منك تكتب أسماء اللي داخلين جنهم و اللي دخلين الجنة و مين قالك أصلاً أن حسابات ربنا سبحان وتعالي زي حسابات حضرتك ؟!
طيب مش لازم الأسئلة دي جاوب علي ده بس ، مين قالك أنت أصلاً أنك داخل الجنة و أنك صح عشا تحكم ؟؟
لو قدرت تجوب أقفل المقال ده أنما لو مقدرتش و ده المتوقع أحب أقولك و بمنتهي الصراحة و الوضوح :
خليك في نفسك حاسبها و عقابها و أعمل اللي أنت مقتنع به طالما مش بتضر حد و دع الخلق للخالق بقي !
أنت كابني آدم مش مطلوب منك تقول للناس تعمل أيه و متعملش أيه و أيه الصح و أيه الغلط ، أنت كل اللي مطلوب منك تتصرف بحريتك و تعمل كل اللي أنت مقتنع به ولما حد يقولك ده غلط واجه بأعلى صوت و قوله أنا حر طالما لا بضر حد ولا بأذي حد و أنه غلط ليا صح ليا !
مش محتاجين أحنا بقي نعمل حملات و برامج و نقول و نادي بالحرية لأن غالباً الناس بطلت تسمع زي ما بطلت تتناقش ، أحنا كل اللي محتاجينه نعمل اللي مقتنعين به بجد  ونتصرف بحرية كاملة و نتقبل كل المختلفين عنا أيا كان اختلافهم ثقافي ديني سياسي ،لازم نقبلهم مش لازم تحترمهم بس لازم تتقبلهم و تتعايش مع فكرة  أن في ناس مختلفين عنك و لازم تتقبلهم لأنهم أحرار طالما مش ضروك بحاجة !
"أنت حــر ما لم تضــر"
لكن لو قررت تسكت و تقول أصل الناس يبقي مش من حقك تتكلم ولا تعترض لما تدخل جامعة مش عايزها و تشتغل في مكان مش بتحبه و تعمل حاجات مش مقتنع بها و تنتهي حياتك علي كرسي جنب شباك بتفرج منه علي الناس و أنت بتتحسر علي عمرك اللي ضاع من غير ما تحس لأنهم معملتش أي حاجة أنت عايزها !
و تكتشف أنك كنت مشي وراء وهم و خايف من سراب و لما يفوت أون كل حاجة تكتشف أن المجتمع مش هو اللي بيبنيك أنت اللي بتبني !
عشان كده لما تلاقي طنط فاطمة بتقول أن نهي بنت كريمة بترجع بعد 11 متغاضية أن ممكن ده يكون ظروف شغلها و متغاضية أن ممكن كل الحاجات الغلط في الدنيا تتعمل قبل 11 عادي ، و لما تلاقي طنط ليلي بتقول أنها شافت وليد بيكلم بنت غير خطبته و أنه ولد بايظ متغاضية أنها ممكن تكون زميلته في الشغل أو من الدراسة أو يعني متغاضية عن كلمة صداقة أصلاً ، و لما تلاقي طنط علانة و طنط فلانة بيقولوا أن عائلة فلان وحشة لمجرد أنهم مختلفين عنهم و شغالين حجج من عينة كده غلط وحرام و المجتمع بتاعتنا بيرفض ده!
أوقف قدامهم و بمنتهي الأستهزاء قول :
هو أحـنـا عايشين في مجتمع .. جايز !!" 


سـارة يحيي محمد 
10/9/2013 

هناك تعليقان (2):

  1. مجتمع ايه، دى شوية ضغائر كدة ملهاش لازمة!

    ردحذف
    الردود
    1. مهو عشان كده بقول مجتمع .. جايز !!
      س التصليح مش محتاج من كل واحد إلا أنه يتصرف بحرية و باللي مقتنع به و يتقبل كل المختلفين عنه بس ..
      أتمنى يكون عجب حضرتك :)

      حذف